Davlat Bayrog‘i kuni munosabati bilan politexnikumda tadbir o‘tkazildi

18-noyabr – O‘zbekiston Respublikasi Davlat bayrog‘i qabul qilingan kun munosabati bilan Dang‘ara tuman 1-son politexnikumida ma’naviy-ma’rifiy tadbir bo‘lib o‘tdi. Tadbirda o‘quv yurtining o‘qituvchilari, guruh rahbarlari hamda talabalari ishtirok etib, davlat ramzlarining ahamiyati va ularga bo‘lgan hurmat haqida keng qamrovli ma’lumotlarga ega bo‘ldilar.

Tadbir avvalida Davlat bayrog‘ining yaratilish tarixi, undagi ranglar va belgilarning ma’nosi, shuningdek, uning xalqimiz hayotidagi o‘rni haqida taqdimot namoyish etildi. Bayrog‘imiz – mustaqillik, erkinlik, tinchlik va milliy an’analarimizning timsoli ekani yana bir bor ta’kidlandi. Talabalarga davlat ramzlariga hurmat ko‘rsatish va ulardan to‘g‘ri foydalanish bo‘yicha qonunchilik talablari tushuntirildi.

Tadbir davomida o‘quvchilarning vatanparvarlik tuyg‘ularini yuksaltirishga qaratilgan chiqishlar, she’rlar va fikr almashinuvi bo‘lib o‘tdi. Shuningdek, politexnikum rahbariyati tomonidan talabalarga yaratilgan sharoitlar, dars xonalari va ma’naviy-ma’rifiy maydonlar ko‘zdan kechirilib, ularni yanada takomillashtirish bo‘yicha fikrlar bildirildi.